2Ti 1 | ATA | STEP | Eni Paulo, ekaukavunu vaikala ano 'o mulai noxine nini Timoti. Eni emasaxaine loxo nini 'alixeni maninasou. Lataua musakiinu vaikala noxou lexe 'ei ane umuxaxu tanu noxou Kalisito Iesu, la uno'u mauli ane kaluxu uasi. La sou Lataua mupalusilo loxo itema sou xaixai noxou Kalisito Iesu sou aa'aloi'a ta mitema no anu a'alo laixe ane ne. Eni alinga lexe alauna mo tanutanuxu mo opo se'isisi noxou Lataua Maminge nenge'a mo Tila noxinge Kalisito Iesu, umomomosou uxolu noxine.

a 1:1-2Apo 16:1; 1Ti 1:2

b 1:3Apo 23:1

c 1:5Apo 16:1

d 1:61Ti 4:14

e 1:7Rom 8:15

f 1:9Ep 2:8-9; Tit 3:5

g 1:10Eva 2:14

h 1:111Ti 2:7

i 1:141Ti 6:20

2 Timothy 1

1 ^aEni Paulo, ekaukavunu vaikala ano 'o mulai noxine nini Timoti. Eni emasaxaine loxo nini 'alixeni maninasou. Lataua musakiinu vaikala noxou lexe 'ei ane umuxaxu tanu noxou Kalisito Iesu, la uno'u mauli ane kaluxu uasi. La sou Lataua mupalusilo loxo itema sou xaixai noxou Kalisito Iesu sou aa'aloi'a ta mitema no anu a'alo laixe ane ne.

Eni alinga lexe alauna mo tanutanuxu mo opo se'isisi noxou Lataua Maminge nenge'a mo Tila noxinge Kalisito Iesu, umomomosou uxolu noxine.

Vaikala Peletoto

3 ^bEni avikala laixe ulai noxou Lataua e eni a'oxo'oxonu xaixai noxou, la alavusou axavutalaneni utotomu no anu linga noxilo. Lataua ane eni alavusou axaxai noxou loxo ta xaixasilo ilo'a ta 'ilu'ilusuleli mixaxai tei no anu opone'i maninasou. 4 Eni axavutalanu tama noxine, la eni emasaxa lexe eni amaisine la. Lexe eni amaisine, la eni a'osa manina. 5 ^cEni axavutalaneni no anu muxamuxaxu taneni manina noxou Kalisito Iesu. Xo tei, la xasine ualasie lexe Loi ilee nenine Onike, ane'i mimuxaxu tane'i noxou, la sou eni elavu lexe nini kalumo namuxamuxaxu taneni noxou loxo ane'i ilou ne. 6 ^dTava'u aloxo ne, la sou eni avikalaneni la lexe nini naavutilixu mii laixe ane Lataua mulosine no voxo ane eni emulaxu avolo no kisine. 7 ^eUleenu ane Lataua mulosine ne, anu sou u'oxonenge ta'ume uasi. Anu sou ulosinge xavi mo, sou u'oxonenge tamasaxai'a ta mitema xe, sou usu'ulinenge sou tasaxila'u muamua'inenge.

8 La sou mamu nini namaela sou naa'aloxu Tilasinge ualasou, mo mamu namaela noxilo e eni axoxolu no taasou navunavu, xo eni exaxai noxou Iesu. Ia eni emasaxa lexe no anu xavi noxou Lataua, la nini natavulenu tu'utu'umaxu sou a'alo laixe loxo eni atatavulenu 'o. 9 ^fLataua mupamaulinenge mo mu'avalinge, sou lexe nenge taxolu va'axu no anu 'ili'ilixo masumasua. Nenge te'oxonu 'ili'ilixo laixe, la sou Anu upamaulinenge mo u'avalinge uasi, Anu mu'oxonu aloxo ne, no anu xavutala ilou alauna noxousi. Alauna ne, Anu mumaxa'u noxou Kalisito Iesu tatei no mine Lataua ukoinu mimii uao. 10 ^gIa vaimomo 'o, alauna ne muxali mupala'a lamana noxou Kalisito Iesu, Anu itema sou pamauli. Anu mutaloxolixu soli, ia no anu a'alo laixe noxou, la mulosinge mauli ane kaluxu uasi. 11 ^hLataua musosovosilo lexe eni aa'aloxu a'alo laixe xe amitema sou xaixai noxou Iesu mo amitema sou alosieixu ta mitema lavulavu. 12 Anu aloxo ne, la sou eni atavule tu'utu'umaxu 'o. Ia eni amaela no anu uasi. Xo eni elavusou 'ei ane eni emulaxu taleli noxou mo elavusou manina lexe Anu usaxila'u mii ane eni e'italonu mulai noxou mole ulai utalo no voxo ane Anu ulivu une'e la.

13 Mii ma'ia ane nini nelomusou noxilo, la nelavu lexe anu vaikala noxou Lataua mo nalosieixu ta mitema no anu. Mo namuxamuxaxu taneni noxou Kalisito Iesu mo namasaxai'a ta mitema loxo Kalisito Iesu mumasaxaine. 14 ⁱEni emasaxa lexe nini nasaxila'u mii laixe ane Lataua mu'italonu noxine laixe no anu xavi noxou Uleenu Tavuna e uxolu noxinge.

15 Nini nelavusou aloxo 'o. Ta mitema noxou Lataua latala no xalee lia tila ne Asia ne, ane'i mixiu tumali'a mune'e noxilo mukalu ne. Ta tamei noxi'a ualasi'a lexe Pixelo ilou Emoxenesi.

16 Ia eni alinga lexe Tila tanuxu Onesipolo ilo'a ta tema tani noxou. Xo anu mu'oxonu opoleli mu'osa alaxu tavu'alo misevile mo umaela noxilo sou ane'i misakileli 'o uasi, 17 ia anu molu mune'e no tuala tila ne Romu, la anu ukakamulileli misevile xoo mole muxalisilo. 18 Eni alinga lexe Tila tanuxu no voxo ane Iesu ulivu une'e la. Xo nelavu laixe lexe no tuala tila ne Epeso ne, la anu musu'ulileli laixe no anu mimii tavu'alo misevile.